هو صحيح الذكر بعد الصلاة جهرًا مش بدعة؟!

بقلم الشيخ : عبد الله قدري سعد

 

(حوار من وحي الخيال بين عم حسن وعبدالله)

عم حسن:
يا شيخنا ، انتو بتذكروا بعد الصلاة بصوت عالي ليه؟!
مش الذكر كده بدعة؟ المفروض كل واحد يذكر لوحده وسرًّا ؟

عبدالله (بابتسامة)
استنى بس يا عم حسن، خليني أقولك حاجة صغيرة
هو انت عارف إن الذكر بعد الصلاة بصوت، كان بيحصل في عهد النبي ﷺ؟

عم حسن (بتعجُّب):
إزاي يعني؟! دا أنا عمري ما سمعت كده.

عبدالله:
اسمع الحديث ده من البخاري: “كنا نعرف انقضاء صلاة رسول الله ﷺ بالتكبير”
يعني الصحابة كانوا بيذكروا بصوت بعد ما النبي ﷺ يسلّم من الصلاة…
يسمعوا بعض بيكبّروا وبيذكروا

عم حسن:
يعني مش بدعة؟

عبدالله: لا يا سيدي
دي سنة، ولو كان فيها حاجة غلط، ما كانوش الصحابة عملوها
ده غير كده، في حديث تاني:  النبي ﷺ قال: “إن لله ملائكةً سياحين، يلتمسون أهل الذكر…”
فلما يلاقوا ناس قاعدين يذكروا الله، يبلغوا ربنا، وربنا يغفر ليهم

عم حسن:
طيب ما هو الذكر ممكن يكون سرًّا!

عبدالله: أكيد
واللي يحب يذكر سرًّا ربنا يقبله
لكن اللي يحب يذكر جهرًا، ما نمنعهوش طالما مافيش أذى ولا رياء ولا بدعة

عم حسن (متفهم):
يعني ينفع كده… بس من غير ما نعتقد إنه فرض ولا لازم دايمًا  .

عبدالله:
بالضبط
وعلى فكرة… الإمام النووي قال:
“رفع الصوت بالذكر بعد الصلاة مستحب، ما لم يكن فيه أذى.”

عم حسن:
والله دي أول مرة حد يشرحلي كده ببساطة

عبدالله (ضاحكًا):
واحنا بنتعلّم سوا يا عم حسن
ويا بخت اللي عمر قلبه بالذكر… سواء وحده أو مع أحبابه