ليلة القدر: فرصة العمر لمغفرة كل الذنوب!

بقلم : الشيخ الطيب محمد عبد العال

إحنا داخلين على العشر الأواخر من رمضان، والكل مستني ليلة من أعظم الليالي في السنة، ليلة القدر، اللي ربنا قال عنها في القرآن: “خيرٌ من ألف شهر”! يعني عبادة ليلة واحدة فيها أحسن من عبادة 83 سنة!

يعني إيه ليلة القدر؟

هي ليلة بتكون في العشر الأواخر من رمضان، والأرجح إنها في الليالي الفردية (21، 23، 25، 27، 29). في الليلة دي بتنزل الملائكة، والدنيا بيكون فيها سلام وهدوء لحد الفجر، وأي دعوة بتُستجاب، والذنوب بتتمسح.

إزاي ذنوبي كلها تتغفر؟

النبي ﷺ قال: “من قام ليلة القدر إيمانًا واحتسابًا غُفر له ما تقدم من ذنبه”، يعني لو قمت الليل وصليت ودعيت بإخلاص، ربنا هيغفر لك كل الذنوب اللي فاتت! فرصة عظيمة تبدأ بيها صفحة جديدة مع ربنا.

نعمل إيه في الليلة دي؟

الصلاة والقيام: حاول تصلي قيام الليل ولو ركعتين زي ما تقدر.

الدعاء الكتير: وأهم دعاء قاله النبي ﷺ: “اللهم إنك عفو تحب العفو فاعفُ عني”.

الاستغفار والتوبة: اطلب من ربنا يسامحك على أي ذنب عملته.

القرآن والذكر: حتى لو صفحة واحدة، المهم تستغل الوقت في طاعة.

الصدقة: حتى لو بجنيه، المهم تعمل خير.

إزاي نعرف ليلة القدر؟

في علامات بتكون في الليلة دي، منها:

الإحساس بالراحة والهدوء.

الجو بيكون لطيف، لا حر ولا برد.

الشمس بتطلع الصبح من غير شعاع قوي.

فرصة ما تتعوضش!

ليلة واحدة ممكن تغير حياتك كلها، فلازم تستغلها كويس، وتدعي من قلبك، يمكن تكون هي الليلة اللي ربنا بيعتقك فيها من النار ويكتب لك فيها بداية جديدة. ما تضيعش الفرصة!