أسباب انفلات الأبناء والتغلب عليها

لو عندك أولاد أو بنات صغيرين ، ومش عاوزهم يخرجوا من إيدك لما يكبروا ، اقرأ المقال ده .

بنتكلم عن الموضوع ده عشان الأسر دلوقت بتصرخ من انفلات أولادها ، وبعدهم عنهم ، وإنهم مش عارفين يسيطروا عليهم .

زمان كانت الأسر تشتكي من مصاعب تربية الأولاد ، وكان ده شيء عادي ، لكن دلوقت الأسر بتشتكي من طباع البنات وصعوبة إقناعهم ، واختلاف توجهاتهم ،ومصاعب تانية .

المهم ، ازاي أعرف اسيطر على أولادي وأحافظ عليهم من الآن لحد ما يكبروا ؟

الإجابة مش بسيطة ولا سحرية ، دي خطة محتاجة فهم وحسن تطبيق ومتابعة .

أولا : التخلي عن العصا :

وهي دي النقطة المفصلية والمحورية في المشكلة وهي إننا لازم نفهم إن زمن العصا انتهى ، والجيل الحالي لا يصلح معه سوى الإقناع ، والاقناع مش هيحصل إلا بصداقة ، وثقة .

فلابد ندور عن أسلوب في التعامل معهم غير الضرب والزعيق .

ثانيا : البيت لازم يكون جاذب مش طارد :

بيوتنا لو فيها خناق وزعيق ما بين الوالدين أو بين الوالدين والأبناء فالبيت مرشح جدا إنه تحصل فيه مشاكل وانحرافات .

البيوت الهادئة اللي بيتم التعامل فيها بالإحسان ما بين الأطراف ، والمشاكل بتتلم ومش بتكبر ، ولو فيه مشكلة بين الأبوين بتكون بينهم في غرفة مغلقة، البيت ده مرشح جدا إنه يكون ناجح . وجاذب للأولاد بعد ذلك في المراحل المتقدمة .

ثالثا : بناء الثقة منذ الطفولة :

ودي نقطة مهمة للغاية ، لأن الأب والأم من الطفولة نجحوا في تفريغ وقت للحوار مع الولاد ، والاستماع لمشاكلهم ، وإنهم ينصحوهم وينقلوا لهم الخبرة السليمة ، هتكون النتائج في المراحل المتقدمة مبهرة .

لكن فيه أمور بتهدم الثقة دي ، منها إن الابن أو البنت يلاقي رد فعل سيء من الأب أو الأم لما ييجوا يتناقشوا معاهم ، أو يحكوا لهم عن مواقف أو غلطات هم وقعوا فيها ، أو إن الأم تبلغ الأب بأسرار أولادها . وهنا بيحصل نوع من عدم الثقة الشديد بين الأولاد والأبوين .

رابعا : نذاكر عشان ولادنا :

والمذاكرة هنا معناها إننا نحرص كآباء وأمهات على تثقيف نفسنا عشان نكون مدركين تحديات المرحلة ، ونقدر ننقل لأولادنا خبرات سليمة .

لابد نقرأ في أساليب التربية ، وفي علم نفس النمو ، وفي تحديات الوقت ، ومشكلات الأولاد والبنات في كل مرحلة سنية ، ونفهم استراتيجيات التغلب على مشكلاتهم .

الأسس الي فاتت دي بيؤسس عليها النجاح في مصاحبة الأولاد ، وربنا بيعيننا بالأسباب دي إننا نطلع بيهم من الطفولة للمراهقة بسلاسة وبمشاكل قليلة .