إرشادات العمرة والحج – سؤال وجواب

إعداد: د/إبتسام عمر عبد الرازق

خواطر وإرشادات دعوية موجهة للنساء في رحلات العمرة والحج

س: نويت العمرة، أهم حاجة أعملها قبل الإحرام؟
ج: جهّزي نيتك… واغسلي قلبك قبل جسدك، لأن النية هي المفتاح. اغتسلي، وتطيّبي (قبل الإحرام)، ولبِّي بقلب حاضر.

س: إيه هو الإحرام للبنات؟
ج: ملابس نظيفة، ساترة، بدون زينة ولا عطر بعد النية، مع تغطية كاملة أمام الرجال. ومفيش لون محدد، لكن الحياء أجمل ثوب.

س: هل لازم أقول “اللهم لبيك عمرة” بصوت؟
ج: البنات ينووا بقلبهم، وممكن يهمسوا بيها بهدوء، لكن لا ترفعي صوتك زي الرجال.

س: وأنا بطوف، أقول إيه؟
ج: مفيش دعاء مُحدد، ادعي اللي في قلبك… قولي: “يا رب”، “سامحني”، “قوّيني”، “قرّبني منك”، ربنا سامعك.

س: لو تعبت وأنا بطوف، أعمل إيه؟
ج: خدي راحتك… قعدي وارتاحي، وكمّلي بعدين، ربنا مش هيضيع تعبك، ولا هيحاسبك على ضعفك.

س: وأنا في السعي، أقول إيه؟
ج: زي الطواف، مفيش دعاء محدد. لكن اجعلي خطواتك دعاء… “يا رب اجعل كل سعيي ليك، مش للدنيا”.

س: هل يجوز لبس الكمامة في الإحرام؟
ج: نعم، خاصة للنساء، لأنها مش من محظورات الإحرام عليهم.

س: ممكن ألبس شراب وأنا محرمة؟
ج: طبعًا، لبس الشراب للبنات جائز أثناء الإحرام، بل مستحب للستر.

س: لو جاتني الدورة قبل العمرة؟
ج: اصبري، واحتسبي، وربنا كاتب لك الأجر، تنتظري لحد ما تطهري وتبدأي النسك إن شاء الله.

س: أهم نصيحة للبنت في العمرة؟
ج: خفّفي الكلام… خفّفي الصور… وركّزي على “أقرب رحلة لربنا” مش “أجمل صورة قدام الكعبة”.