من أشد انواع الابتلاء النسب السئ

بقلم الشيخ : جمال عبد الحميد ابراهيم

عضو لجنة صانعي السلام والمنظمة العالمية لخريجي الأزهر

النسب مش كلمة بنقولها وخلاص… النسب هو “بيت وأهل ونظام حياة كامل..

يعني لما شاب بيقرر يتقدم لبنت، أو بنت بتوافق على شاب، لازم يفهموا حاجة أساسية جدًا:

إنت مش بتختار شخص بس… إنت بتختار عيلة كاملة.

لازم تبص كويس:
مين اللي ماسك الكلمة في البيت؟ الأب ولا الأم؟
طريقة التربية عاملة إزاي؟
التدخلات في القرارات شكلها إيه؟
فيه احترام وحدود ولا كل واحد داخل في حياة التاني؟

الحاجات دي مش تفاصيل… دي اللي بتحدد هل البيت ده هيمشي بهدوء ولا هيبقى صراعات طول الوقت.

ومش معنى كده إننا نحكم على حد، لكن لازم نبقى واعيين إن مشاكل كتير جدًا في الجواز مش بتكون بين الزوجين…
بتكون بسبب أهل ونظام بيت وتدخلات من البداية.

عشان كده بقولها بوضوح:
قبل ما تختار شريك حياتك… اختار البيت اللي جاي منه.

لأنك ممكن تختار شخص كويس… لكن تتعب جدًا بسبب البيئة حوالينه.

وخلي بالك:
الجواز مش خطوة عاطفية وبس… ده قرار بيبني حياة كاملة أو بيهدمها.
ربنا يرزق كل واحد بالاختيار الصح اللي فيه ستر وراحة واستقرار