مجلة روح الاسلام فيض المعارف
المقال الثالث من سلسلة ( من الحياة من نجا ومن هلك )
بقلم الدكتور : محمد زغله
مؤسس مدرسة الإمام الرائد
تقول لحد (تعالى كل معايا، أعملك ساندوتش؟ تشرب شاي؟)
يرد يقولك : (لأ، شبعان، لسة شارب، سبقتك، مش دلوقتي، مش عاوز، مليش نفس، لما أخلص، كل أنت)
والأسوأ اللي يشاور لك بالرفض بإيده أو راسه
تقول لحد (عامل إيه؟.. أخبارك إيه؟)
يرد يقولك : (تمام، كله حلو، كله كويس، زي الفل، ماشية، شغال)
ولو قاري ومثقف يقولك : (غرقان في بحار من النعم، في زحام من النعم، في نعمة كبيرة)
ردود عفوية تلقائية غير متعمدة.. لكنها لا تليق ..
أولاً : لأنك بترد نعمة ربنا جاية لحد عندك.. وياعالم هتدوم لك ولا لأ. !!
فلازم تحمد ربنا على كرمه وعطاؤه ورزقه الذي ساقه لغاية إيدك بغير حول لك ولا قوة..
وبعد كدة ضيف أي حاجة عاوز تقولها..
ثانياً : لازم تشكر اللي بيقدم لك نعمة ربنا، وكلف نفسه وبيعرض عليك ليك لإكرامك ومحبتك وتعبير عن تقديره لك
وهو مش محتاج منك حاجة..
ترد تقول: الحمد لله.. ربنا يخليك.. شبعان والله.. بالهنا والشفا
الحمد لله.. أشكرك .. تسلم إيدك.. كتر خيرك
لسة وآكل.. سبقتك من شوية
يقول سيدنا رسول الله (من لم بشكر الناس لم يشكر الله)
وانت لا بتشكر الناس ولا بتحمد الله.. !!
ولما حد يقولك (عامل إيه؟.. أخبارك إيه؟)
قدم الحمد لله والشكر لله
وبعدها تشكر السائل على الاهتمام بيك والاطمئنان عليك ، حتى لو كان من باب الحوار الروتيني التقليدي في بداية اللقاء ، أو المكالمة ، أو الشات.. وبعد كدة تزود أي معنى يعظم شكر الله..
يقول الله تعالى
(وَهُوَ اللَّهُ لا إِلَهَ إِلا هُوَ لَهُ الْحَمْدُ فِي الأُولَى وَالآخِرَةِ)
و(لئن شكرتم لأزيدنّكم)
