قضاء حوائج الناس.. عبادة يغفل عنها كثيرون

الحياة مش بس صيام وصلاة، وجلوس في المسجد وعمرة وحج الايام ده فرصة إننا نحس ببعض، ونقف جنب اللي محتاج. تخيل نفسك في ضيقة، ولقيت حد يجيلك ويسألك: “محتاج حاجة؟”، إحساس جميل، صح؟! سيدنا النبي ﷺ قال: “واللهُ في عونِ العبدِ ما كانَ العبدُ في عونِ أخيهِ”، يعني كل ما تساعد غيرك، ربنا هيسهّل لك أمورك ويكون في حاجتك. قضاء حوائج الناس مش مجرد فعل طيب، ده باب من أبواب الرحمة اللي بيخلي حياتك مليانة بركة وسعادة.

المساعدة مش شرط تكون بفلوس، ممكن تكون بكلمة طيبة ترفع معنويات حد، أو بوقت بسيط تقضيه في مساعدة حد، أو حتى بدعوة صادقة من قلبك لحد محتاجها. الخير أبوابه كتير، وكل حاجة بتعملها، حتى لو صغيرة، ليها أجر كبير عند ربنا. فاكر الصحابي اللي كان معتكف في المسجد، ولما خرج يساعد أخوه في حاجة، سيدنا النبي ﷺ قال له: “لَأَنْ تَمْشِيَ مَعَ أَخِيكَ فِي حَاجَتِهِ خَيْرٌ لَكَ مِنَ الاعْتِكَافِ فِي مَسْجِدِي هَذَا شَهْرًا”!! يعني خدمة الناس ممكن تكون أعظم عند ربنا من عبادات كتير.

جرب النهاردة تبدأ بنفسك.. دور حواليك، شوف مين ممكن تساعده، حتى لو بحاجة بسيطة.. الخير بيرجع، ولو كنت في عون الناس، ربنا هيكون في عونك في وقت احتياجك تعرف في صدقات ببلاش من غير ما تدفع فلوس

تبسمك في وجه أخيك المسلم صدقه.
الكلمه الطيبه صدقه .
كل خطوه تخطوها الي المسجد صدقه
السعي في قضاء حوائج الناس صدقه.
انك تقول كلمه حق في واحد عنده مشكله صدقه .
انك تصالح بين اتنين متخاصمين صدقه.
تساعد حد في شيل حاجه تقيله صدقه .
اماطة الاذي عن الطريق صدقه.
تعمل شير لحاجه مفيده من تعاليم دينك صدق .
وقال سبحانه وتعالي [وما تقدموا لأنفسكم من خيرا تجدوه عند الله هو خيرا واعظم آجرا ] صدق الله العظيم