ها قد أظلّتْنا أيامٌ عظيمةٌ، ونفحاتٌ ربانيةٌ، وفرصةٌ لا تُعَوَّض… إنّها أيام العشر من ذي الحجة، أيامٌ عظّمها الله، ورفع قدرها، وأقسم بها في كتابه الكريم، فقال: ﴿وَالْفَجْرِ * وَلَيَالٍ عَشْرٍ﴾ [الفجر:1-2]، قال ابن عباس – رضي الله عنهما –: «هي عشر ذي الحجة».
يعني يا جماعة الخير، أيّ عملٍ صالحٍ في الأيام ديّ، مهما كان بسيط، له عند الله وزن عظيم ما يتكررش باقي أيام السنة.
قال الإمام ابنُ حجر – رحمه الله -: «وَالَّذِي يَظْهَرُ أَنَّ سَبَبَ افْتِضَالِ عَشْرِ ذِي الحِجَّةِ: اجْتِمَاعُ أُمَّهَاتِ العِبَادَاتِ فِيهَا، وَهِيَ: الصَّلَاةُ، وَالصِّيَامُ، وَالصَّدَقَةُ، وَالحَجُّ، وَلَا يَأْتِي ذَلِكَ فِي غَيْرِهَا».
يعني ربنا سبحانه وتعالى جمع لك في عشر أيام، كل أنواع العبادات! تصلي، تصوم، تذبح، تتصدق، تحج، تذكر ربك، تكبر، تهلل… ده موسم شامل، ومغنم كامل!
يا أهل الطاعات، يا عشّاق الجنات:
العاقل من يستعدّ لهذه العشر من قبل دخولها، يخطط ليها زي ما بيخطط الواحد لأهم صفقة في عمره، أو لامتحان مصيري، ليه؟ عشان ده موسم يتقرر فيه مصيرك الأخروي.
– عايز تمشي على الصراط زي البرق؟ – عايز تلقى الله وهو راضٍ عنك؟ – عايز تموت ولسانك رطب من ذكر الله؟ ابدأ من دلوقتي واشتغل على قلبك.
يا من أثقلته الذنوب، يا من تعب من معاصيه، يا من قلبه مكسور… دي فرصتك!
قال بعض السلف: “المحروم من حُرم في هذه العشر، والمطرود من لم يغتنمها”
اترك الملهيات، وأقبل على الله، فإنها عشرٌ لا تُعوّض، ولا تدري هل تعود عليك مرة أخرى أم تكون آخر عهدك بالدنيا!
يا مسلمون، من أعظم ما يُستحب في هذه العشر:
1. الصِّيَام: خاصّة يوم عرفة؛ يوم المغفرة العظيم. قال النبي صلى الله عليه وسلم: (صيام يوم عرفة أحتسب على الله أن يكفّر السنة التي قبله والتي بعده) [رواه مسلم]. يعني بصيام يوم واحد، ربنا يغفر لك ذنوب سنتين!
2. التكبير والتهليل: قال تعالى: ﴿وَيَذْكُرُوا اسْمَ اللَّهِ فِي أَيَّامٍ مَعْلُومَاتٍ﴾ [الحج:28]، وهي أيام العشر. وكان ابن عمر وأبو هريرة يخرجان إلى السوق فيكبران ويكبّر الناس بتكبيرهما.
فكَبِّرُوا يا أحباب: “الله أكبر، الله أكبر، لا إله إلا الله، الله أكبر، الله أكبر، ولله الحمد”.
3. الصدقة: تصدّق حتى لو بالقليل، دينار في العشر دي ممكن يُوزن عند ربنا بأطنان من الذهب في غيرها.
4. بر الوالدين، وصلة الرحم، وقيام الليل، وقراءة القرآن، والدعاء، والإكثار من الاستغفار.
أحِبَّتي في اللهِ، اسأل نفسك سؤال صدق:
لو دي آخر عشر تعدي عليك قبل موتك… هتضيعها؟ هتفضل مشغول بالدنيا وتفوت النفحة؟! ولا هتكون من الّلي سمعوا النداء واستجابوا، وأقبلوا بقلبٍ محبّ، ونفسٍ طامعةٍ في الرحمة؟
فيا من ترجوا الجنة، ويا من تخشى النار، ويا من تشتاق لرضا الله: اغتنم العشر، واستعدّ للقرب، فإنها عشرة أيام فقط… ولكنها تصنع العمر كله!
يعني حتى لو ذنوبك مليّا السما… ما تيأسش، تعالى، وربك هيستقبلك بالرحمة والمغفرة.
يا شباب:
العشر دي فرصة نبدأ نغيّر، نبدأ مشوار جديد مع ربنا، نترك صحبة السوء، نبتعد عن الشهوات، نترك الأغاني، والمواقع اللي بتبعدنا عن ربنا، ونقرب من القرآن، من الصلاة، من السكينة اللي كانت قلوبنا مفتقداها.
يا رجال ويا نساء:
اغتنموا كل لحظة: – اتصدقوا، حتى لو بجنيه. – زُوروا مريض، خُدوا بإيد يتيم. – صِلُوا أرحامكم اللي قاطعينها من سنين. – سامحوا، وابدأوا من جديد. – كبّروا الله في قلوبكم وبيوتكم.
وتعالوا نفكر في قمة العشر:
يوم عرفة!
اليوم اللي ربنا بيُباهي فيه ملائكته بعباده، يوم يُغفَر فيه الذنب، ويُعتَق فيه الرقاب، يوم تُجاب فيه الدعوات، وتُرفَع فيه الحاجات، قال النبي صلى الله عليه وسلم: (ما من يوم أكثر من أن يُعتق الله فيه عبدًا من النار من يوم عرفة).
وده مش بس للحجّاج! لأ، ده لينا كلنا، لو صمت يوم عرفة، ورفعت إيديك، وبكيت وقلت: يا رب… ربنا هيغفر ويُكرم ويرفعك!
رسالة أخيرة:
اللي هينجح في العشر دول… هو اللي هياخد بعدها شهادة تقوى من ربنا، هيحسّ إنه شخص تاني… أنضج، أنقى، أقرب، وأهدى قلبًا. هيودّع العشر، وقلبه مليان رضا، ولسانه بيسبّح، وعينه بتدمع فرحًا إنه عرف الطريق أخيرًا.
فيا أهل لا إله إلا الله:
اغتنموا ما بقي من العشر، وخُذوا من صحتكم لمرضكم، ومن شبابكم لهرمكم، ومن حياتكم لموتكم.
قال الحسن البصري رحمه الله: “يا ابن آدم، إنما أنت أيّام، إذا ذهب يومك، ذهب بعضك”
فخُدّ بالك من اليوم اللي بيعدّي، لأنّه عمر بيضيع ومش بيرجع.
مجلة روح الاسلام فيض المعارف
