صحح مفاهيمك : التجسس وتتبع عورات الناس

بقلم : جيهان عبد العزيز بدر
معلمة التجويد والقراءات العشر وعضو نقابة القراء المصرية

التجسس هو البحث عن عورات الناس وعيوبهم وأسرارهم وفضهحم بها دون غرض مباح

طيب هوا فيه تجسس مباح؟

ايوة طبعاً
لازم نعرف الفرق بين التجسس المباح اللى بيكون في مصلحة الدولة أو مصالح البلاد الإسلامية في تعاملها مع أعدائها ، وبين تتبع عورات الناس لأغراض دنيئه حرمها الشرع
زى الفضيحه وكشف أسرار الناس

الشخص اللى بيسمح لنفسه يتجسس على الناس ده يشترك مع الذباب فى وقوعه على القاذورات ونقلها من مكان لمكان

كذلك المتجسس يقع عورات الناس وعيوبهم واسرارهم وينشرها بين الناس

التجسس له صور كثيره زى استراق السمع من وراء الابواب و النوافذ أو استراق السمع فى المجالس والتقاط أخبار الناس واذاعتهاأو النظر فوق الأسطح أو النظر في شرفات المنازل المجاورة أو الشقه اللي أسفل أو الدخول على الناس بيوتها دون استئذان

و كمان من صور التجسس إنك تكون في مواصله واللى جنبك متابع بتكلم مين وبكتب إيه على موبايلك

وكل ده نهى الشرع عنه وقيس على كده كل تصرف يهدف إلى كشف اسرار الناس وفضحهم بها

الشخص المتجسس بيعرض نفسه لغضب ربنا فى الدنيا والآخرة و دايما بيكون فى محل ريبه وموضع شك من الناس

والمسلم لازم يكون نقى تقى ورسولنا الكريم صلى الله عليه وسلم قال
(المسلم من سلم المسلمون من لسانه ويده)

كما قال صلى الله عليه وسلم (من حسن إسلام المرء تركه ما لا يعنيه)
صدق رسول الله صلى الله عليه وسلم

خد بالك :

التجسس مرض خطير يفكك المجتمع و يفسد العلاقات بين الناس ويسبب الكراهية ويدفع إلى العداوة والانتقام

ويجعل العلاقات بين الناس سامه وكلها ريبه وشك ويكثر الإشاعات فى المجتمع ويخلى المجتمع هش ضعيف مفتقد القدوة و ربنا سبحانه وتعالى نهى عنه

قال تعالى (ولا تجسسوا ولايغتب بعضكم بعضا..)

وحذرنا منه نبينا صلى الله عليه وسلم
قال رسول الله ﷺ: “من تتبع عورة أخيه تتبع الله عورته، ومن تتبع الله عورته يفضحه ولو في جوف بيته”

كماقال الحسن البصري: أدركت أقواما لم تكن لهم عيوب فتكلموا في عيوب الناس فأحدث الله لهم عيوبا ، وأدركت أقواما كانت لهم عيوب فسكتوا عن عيوب الناس فستر الله عيوبهم.

احنا محتاجين نتخلى عن كل الصفات السلبية واللا أخلاقية عشان ننهض بمجتمعنا الاسلامى

ونحقق الغاية اللى ربنا خلقنا من أجلها وهى العبادة وعمارة الأرض
والإصلاح فى الأرض لا الإفساد فيها لكى نفوز برضا ربنا فى الدنيا وبالجنة فى الآخرة

استقيموا يرحمكم الله